الموضوع: بنت الحلال
عرض مشاركة واحدة

نادي الإتحاد الحلبي السوري

كُتب : [ 09-06-2008 - 12:07 ]
رقم المشاركة : ( 1 )
الصورة الرمزية haseeko
 
haseeko
أهلاوي للعضم

haseeko غير متواجد حالياً

       
رقم العضوية : 11
تاريخ التسجيل : Sep 2007
مكان الإقامة : الهونولولو
عدد المشاركات : 1,356
قوة التقييم : haseeko has a spectacular aura abouthaseeko has a spectacular aura abouthaseeko has a spectacular aura about
بنت الحلال

بنت الحلال كلمه سمعناها كتير ولكن مين هي بنت الحلال أو الشريكة الي بيحلم فيها أي شب
بالبداية في مفهوم غلط عند الشباب وهو انو خلينا نعفس على كيفنا مع البنات وبالأخر بتجي الحجه(الوالدة) وبتخطبلو بنت بيتوتية المحير بالموضوع انو البنت الي رح تجيبا الحجه ياترى هي بنت الحلال
الاكثر حيره بالموضوع هو لو اننا اخدنا نظره أقرب للي عبصير بمجتمعنا والي بشوف الي لابسه أسود بأسود أو محجبه على الاقل هي صاحبه الشرف والعفاف أما البنت السبور (الغير محجبه ) هي ما ممكن أن تصح الا صديقه او لنبصبص عليها
ياترى لو قيمنا بنت الحلال من هاد الباب رح نوصل لشي الجواب أكيد لأ والي بثبت أنو لأ هو الشي الي بنشوفو حولينا مثلا كنا نشوف بالجامعه بنات سبور متل مابتسمو بس الواحد ما يقدر يحكيهم كلمه وسعيد الحظ الي ممكن يوقف معهم وطبعا هي عبتجبروا على احترامها
بالوقت نفسو بنشوف مياعات من بنات محجبات و نايمين على كتاف الزميل وعبغنوا ياليل
معناها اللباس مالو علاقه ببنت الحلال
طيب لو انك شفت بنت الحلال واقتنعت فيها شو رأيك لو عرفت انها حبت قبلك مرة او تنين ياشاطر الغالبيه رح يدخل لقلبن الشك ويروحو يدورو على البنت البيتوتيه والي أكيد طالما جايبتا الحجه فمستحيل تكون حكت مع غيرك وأنت الي ألك شرف الفوز بهالانسانه العظيمه
بس الي بيرجع بحير ياترى هالانسانه الي حبت مره او تنين قبلك ياترى حبتك بصدق أو لأ ياترى شو كان ظروفها حتى تركت الي كان قبلك ليش ما تكون حبتك من قلبها ورح تخلصلك العمر كلو وتصير هي شرفك وعرضك الي تصونوا بالوقت نفسو ممكن البيتوتيه الي الحجه جابتها ممكن بالايام تخونك وما اكتر الخيانات الزوجيه واذا مو مصدقين نزلو يوم عالقصر العدلي وسمعوا
كمان مره تانيه اختلطت الأمور لحتى دخلت التكنولوجيا بيوتنا ودقي يامزيكا فبنت الحلال اصبحت أكتر موديرن لتتكيف مع متطلبات العصر الجديد فصارت تشوف أحلا اللبس والموضات وتشوف احلا الغراميات وقصص الحب وماعادت القطه مغمضه والكل تفتح
البنت الي كان عدد من الشباب يدور عليها وهي القطه المغمضه قد تفتحت وصارت تشوف وتسمع كلشي وهي ببيتا وصار عندها حب التقليد كمان بس شو الموقف من البنت الي مشيت في عصر التطور متلها متل غيرها
ولعل الدخول الاكبر وبقوه هو لعالم الانترنت والي صار حوليه جدل كبير بين العقول الشبابيه الي بتبدو متفتحة ومنيره على الانترنت ولكن الواقع مختلف تماما وأبسط كلمه ممكن الواحد يقلك هي انت بترضا أختك تفوت عالنت هون مافي قدام الواحد الا انو يضيع ويزيد من حيرتوا ويقول لحالو معقول يكون النت عالم سيء للدرجه هي وليش هالنظره للي بتفوت على الانترنت وتسمى ببنت النت وللأسف في شباب بخجلو يقولو انهم تعرفوا على فلانه من ورا النت
السؤال كبر اكتر وهو هل الشب لما بفوت النت حلال وأما البنت بس فاتت عليه قد أرتكبت جريمه ولازم ما حدا يعرف عنها شي وياحرام كتير من البنات بخافو ينعرف لو اسمن الأول مشان مايقطع أخوها رقبتها أو اذا بالمستقبل أجاها أبن الحلال (هاد اذا كان أبن حلال بالاساس) ما يتركها لهلسبب
ياترى البنت الي عبتفوت النت طلعت من مفهوم بنت الحلال الي الشب بدو يتزوجها سؤال بتحدا كتار يجابو عليه وبقول سلف للي بدو يجاوب أنك عبتتصنع الكلام وهاد مو رأيك فلا تعمل حالك واعي
ياترى البنت الي مافاتت عالنت أو الي فاتت عالنت وما حدا عرف فيها هل هي بنت الحلال ومثال الشرف والعفه كمان مو شرط فممكن يكون الها 100 علاقه ومو تاركه شب الا وبيعرفا بينما البنت الي عالنت عبتفوت كرمال تقضي وقت وتتسلا وبالوقت نفسو تتعلم وتتثقف وتشوف شغلات جديده
وسط هالزحمه الماضيه وفي كتير نقط ممكن تنحكا ضاع مفهوم بنت الحلال وما عاد في تعريف الها وماعاد الواحد يضمن مين هي بنت الحلال من غيرها
بس ياترى شو هو الحل
أنا رح قول رأيي وهو بمثلني أنا حسيكو كاتب الموضوع أنو بنت الحلال هي البنت الي اختارها قلبك بنت الحلال هي الي حتحبها وتحبك وتعيشوا العمر كلو لو أخدنا الموضوع من زاويه الحب رح تصير حياتنا كلها سعاده ويصير همنا الحبيب وبس بغض النظر عن كلشي حكيتو من شوي والمقارنات
الموضوع برأيي هو للطرفين الشباب كانو أم بنات فالطرفين لو وصلو للشريك الي بحبهم لايفرطو فيه وبعمرو الواحد مايفكر يخسر أنسان بحبوا لأنه حيكون خسر الدنيا كلها من دون مايعرف وضيع على حالو سعاده العمر
بنت الحلال يلي قاعد و عبتقرا ياصديقي هاد الموضوع ممكن تكون سبور وسبق حكت مع غيرك وفاتت جامعات وانبسطت ودورت وقعدت تشرب أركيله بمطعم وقدام الناس كلها وطلعت رحل بس صدقني لو حبتك وحبتك من قلبها فلا تخسرها لأنه يمكن يكون أضفرها بسوا كتير بنات ممكن تظنهم ملائكه بس الحقيقه يمكن لو عرفتها تغير رأيك فالعبره هي بهالانسانه الي حبيتها وحبتك شوف قلبها شوف الحب الي جواتها قبل ماتسمع لكلام الناس
وانت يابنت الحلال الي عبتقري موضوعي ممكن يجيكي شب كحيان وبشع و معتر بس هالشب بحبك لاتخسريه وتضيعي على حالك عمرك الي جاي خدي الي بحبك وحتشوفي أنو حبوا هو كنوز الدنيا كلها
ولاتركضي ورا المظاهر والكل مو بس راكض طاير وراها
بتمنا من الكل يدور على الحب وقتها حيكون بنت الحلال وأبن الحلال أسعد اتنين بالدنيا:021:
أهم شي بأبن الحلال وبنت الحلال هو انو يجمعن حب صادق ويعملو شو ماكان حتى مايضيعوا هالحب
بنت الحلال او أبنه عمله صارت نادره كتير فأذا حدا شاف هالانسان لايفرط فيه ولا يطلع لكلام الناس والله حيكون جنبو

طبعا كلشي ذكرتو هو رأي شخصي وبمثل أفكاري والموضوع بعيد عن الدين تماما هو بعالج حاله اجتماعيه من وجهة نظري لا اكتر ولا أقل
مع تحيات المحشش :lol::lol:


التعديل الأخير تم بواسطة : haseeko بتاريخ 09-06-2008 الساعة 12:12
رد مع اقتباس