الموضوع: العرس الحلبي
عرض مشاركة واحدة

نادي الإتحاد الحلبي السوري

كُتب : [ 19-10-2012 - 01:38 ]
رقم المشاركة : ( 1 )
الصورة الرمزية حلب الشهباء
 
حلب الشهباء
إدارة المنتدى

حلب الشهباء غير متواجد حالياً

       
رقم العضوية : 5
تاريخ التسجيل : Sep 2007
مكان الإقامة : حلب
عدد المشاركات : 45,854
قوة التقييم : حلب الشهباء قام بتعطيل التقييم
العرس الحلبي

العرس الحلبي

اسمعوا صوت الطبل و الزمر و شوفوا العبلة و هي عبترقص على جملا .. و صوت الصناجات عم بيناغش رقصاتا و و غنجاتا و هزات كمام توبا اللي هو التوب البدوي ... و شوفوا وراها الكرّادة و الترّاسة .. لابسين العبي الحمر فوق قميص الملس المزرّقة ياقتو و كمامو الطويلة الم...دندلة .. و فوقا القبيعة الموصلية اللي زيقا أسود .. و عالقبيعة هي لفّة حطاطة خمرية مقصبة ...
و قدامن تنين عبيلعبوا بالحكم .. و لا تظنوا بالدنيا كلها في بلد بتتبارز بالسيوف في لعبة الحكم متل حلب ...
و ورا هالعراضة بيجي بقى عرض الجهاز ..
شوفوا يا صحابي الحمّالين شايلين على روسن الصواني الملفحة بالشالة أو بالقازاية و عليها الزهر .. صينية عليها قمقم العطر .. و صينية عليها كاسات الشراب و التقالي .. و صينية عليها فناجين القهوة و الركاوي .. و صينية عليها يشمق العروس الوردي .. و صينية عليها الطشت و الابريق شغل سوق النحاسين ..
و صينية عليها القبقاب الشبراوي المطعّم بعرق اللولو .. و ما مننسى الصينية اللي شايلتا قايمة الحمام و عليها طاسة الحمّام و اللكن .. و كمان لا ننسى اللي شايل بقجة الحمّام المربوطة بالقيطانة .. و أخيرا بجي دشَك الحماية ....
و خلص دور الصواني .. و أجا دور القطع الكبيرة .. شوف تنين شايلين المراية الحجرية الكبيرة البلجيكية المزينة بالريبان ...
و شوف أربعة شايلين الجاردينيار .. و كمان بعدن أربعة شايلين السكرتون و دمغة المرايا كلياتا ملزوقة عليها ...
و هلّق أجا دور الدواب .. دبّة شايلة الصندوق شغل البندقية .. أو من خشب السرو اللي الو ريحة .. و دبة شايلة الطنافس و اليانات .. و دبة شابلة الفرشات و الشراشف و المخدات ..و دبّة شايلة التكّايات و الدشكات .. و دبة شايلة القياس الضونانضو المرقوم بالمفضّضات .. و غيرا وغيرا ....
و طبعا بتكون هالدواب كليّاتا مزينة بالخرز و الودع و الريش و الجراس .. و روسا معصّبة بالمناديل الملوّنة ...
و هالجهاز اللي شفناه أجا كلّو من بيت العروس لبيت العريس .. و أهل العروس اشتروه من الحق اللي ذكرناه قبل .. و زادوا عليه من عندن ...
و هالموكب عم بمشي و الدنيا قايمة و قاعدة ...و المتفرجين في الطريق و المتفرجات من شبابيك البيوت ..
كل هاللي جرى يا صحابي تمهيد ليوم التعليلة ... يلي انشالله بكرا منحكي عنه ....
و بهالصورة منشوف موكب جهاز العروس ..
بحمى الرحمن يا حلب ...

موقع ومنتديات نادي الاتحاد الحلبي - نادي الإتحاد الحلبي السوري Al Ittihad of Aleppo syria - عشاق حلب الأهلي مدينة حلب الشهباء

رد مع اقتباس