عرض مشاركة واحدة

نادي الإتحاد الحلبي السوري

 
كُتب : [ 11-01-2008 - 01:13 ]
 رقم المشاركة : ( 2 )
حلب الشهباء
إدارة المنتدى
الصورة الرمزية حلب الشهباء
رقم العضوية : 5
تاريخ التسجيل : Sep 2007
مكان الإقامة : حلب
عدد المشاركات : 45,753
قوة التقييم : حلب الشهباء قام بتعطيل التقييم

حلب الشهباء غير متواجد حالياً

   

أخر ما كتبته لنا

السلام عليكم ورحمة الله و بركاته
الرسالة كتبت كالآتي دون تصحيح لغوي نحوي مني بالرغم من تعذر قرأتي لبعض الكلمات الارتجالية
بدأت رسالتها بإسم الله الرحمن الرحيم
بعد السلام...... رسالتي لالكم منا رسالة عادية لانها يمكن تكون أخر رسالة بكتبها بتمنى هيدا الشي ......انا تعبت كتير جسمي تعب
سامحوني اول شي حأكتبو هو كلام موجه لشهد بوصيها فيه انو ما ينقام علي قداس بالكنيسة و لاي سبب من الاسباب
شهد الورقة كتبتها بشكل رسمي اذا واجهك او دايقك اي حدن الورقة مختومة بختمي الخاص و موقعة رسميا محطوطة بالدرج التاني للمكتب
سامحوني يا اغلى الناس بس كان لازم اكتب هيدا الشي لاني اذا تركتو للاخير مين عارف اذا حاقدر كمل الرسالة و لا لاء
مع اني موجوعة كتير و تعبانة بس متل ما عرفتو سارة بتحب الحكي كتير و لو عم تموت
سامحني يا رب انا عارفة اني هلاء عم انزف بس انا مني حأتصل بالمستشفى لانون بدون يوصلولي دم والله العظيم هلكت من كتر الابر صار جسمي متل المصفاية من كتر الابر
عروقي تعبو كل ما بينقلولي دم بينفجر واحد من العروق الضعيفة صار جسمي كلوبقع زرقا متل لي أكل ضرب لشبعان
الله ينهي حياتي عالايمان يارب
اول شي بحب اشكركم كلكم علمتوني اني ارفض القول لي تعلمتو هون باوربا و اللي بيقول ..... لتاخود لازم تعطي .... انتو عطيتوني و ما عطيتكم شي . انتو علمتوني كتير وما تعلمتو مني شي او ما قدرت علمكم شي
كنتو اخوة الواحد منا لمن بينوجع بيقول أخ بس انا لمن كنت انوجع كنت ناديكم بأسمائكم .....ياما انوجع و اصرخ وقول يا قمر وينك..... او ياطارق تعال..... او دانية ساعديني....او كبرياء اااي .... وكتير ناديتك يا عبد الله و يا باسم و يايايايا الكل كل واحد باسمو
انا رد على جمايلكم كلها وانكم خليتوني عيش احلى كم شهر بعمري و الي بيسوو كل عمري لي فات انا قررت و انا بكامل قواي العقلية اني اوهبكم بيتي ببباريس صحيح هو حجار باردة وما بينقاس ببيتي بوابة التميز لي كانت حيطانو مشاعر و حب دفاني و غمرني
و لا تخافو على اولادي ابدا انا امنتون منيح ليصيرو كبار و ما يعتازو مخلوق باذن الرب .... لوقت يعتمدو على نفسونو لا تنسو ماتت امون بس ابون بعدو عايش و موجود الله يخليلون ياه و لا هو بس شغلتو يجيب الاولاد ؟؟؟؟ههه
يا جماعة بيتي و هبتو لكل عابر سبيل ..طالب علم ... او عريس بشهر العسل.. انا بقبري برتاح و بنبسط ... ماعليكم الا انكم تتواصلو مع شهد منشان المفاتيح و العنوان و انا عملتلها توكيل رسمي بهيدا الشي و لكل مين بدو يسافر لباريس شو ما كانت الاسباب او قد ما كانت المدة بيتي بيفتحلكم بوابو هو الكم من اختكم سارة
في الي طلب من كل مين بيسافر باريس انو بمرق على قبري و يقرالي الفاتحة
وبرجع بطمنكم اني ما نسيت ولادي و لا اي حدن واذا بدكم تطمنو اكتر بتقدرو تسألو شهد هي بتعرف كيف انا وزعت املاكي بدون ما انسا ولا حدن ان شاء الله
عبد العزيز.... الحنون.. قلبك يا طرحة العروس ..ياما غمض عيوني و قبل ما فتحون اتخيل انك جاية تطمن علي .... وصيتي لالك انك تدير بالك على حالك و عالمنتدى كلو. هو بيتي و انتو اهلي لا تنسى انت قلت هيدا الشي
.انت بتضل تاج على روسنا . ولا تنساني
عبد الله..... سبق و قلتلك ياريتني اختك عن جد. وصيتي لالك تدير بالك على حالك و ابقى تذكرني كل ما اكلت سمبوسة و قول سارة ماتت و بنفسها تاكول سمبوسة
في شغلة تانية بدي اطلبها منك و ما بعرف اذا بقدر ؟؟
انا ما كان بدي موت عضوة بالمنتدى بس اذا متت وانا عضوة اذا كان في مجال انك ما تلغي عضويتي هيك بضلي معكم ... صح؟؟
على فكرة قلتلو لنيكولا انت صرت رجال قلي كيف هي بابا رجال وهو منو عامل .....لم افهم ما كتبته هنا ......قلتلو ليش حاسب ابوك رجال ... ههه
شهد.....حبيبتي ماما . بحياتك ما رضيتياني اندهلك ماما . انا هلاء مني حرد عليكي يمكن ما اقدر قولها تاني
ديري بالك عاناتالي علميها الصلاة و القرآن و خليها تدعيلي . و لاتخليها تنقطع عن اخوها مع انو بعرف انها مشقة لالك الله يعطيكي الصحة و العافية . وخليها بارة بابوها شو ما صار بيضلو ابوها ماما جاكمنو رجال سيئ بس هو هيك الله يصلحو و يهديه
ماما حني على نيكولا تيتم صغير و جني مرت ابو بتضل غريبة عنو و مو امو انت كنت ام الكل وحاولي جريه لطرفك انت و ناتالي
في شي بدي خبرك عليه انا اتفقت مع اولادي اني بالبيت اندهلون بغير اسمائون انا بنادي نيكولا ... عبد الله على اسم جدو
و ناتالي ... بندهلها ايمان وهنن كتير حبو اسمائون الجديدة خليكي عم تناديلهم هيك بالبيت
الله يرضى عليكي يا ايمان كوني منيحة مع شهد ومع عبد الله هي معك منا ضدك و لا تكوني انت و الزمن عليها
ماما احفظي القرآن هو الي بيحميكي من كل اذى يا عمري
بقلك يا ماما انا راحلة عن هالدنيا بس تاركة شقفة مني هي ايمان و عبد الله
بابا عبد الله .........شو كنت بتمنى موت بين ايدك تضمني و تبلني دموعك كانت اكيد صحتني او عالاقل ما كنت متت تعبانة
بابا.. لاتزعل بنتك رح تنزف ببدلة بيضا لتواجه ربها متل العروس لباسي هو التقى و الايمان يلا يا بنات زلغطو لا تزعلو سارة ارتاحت ما ماتت كبرياء. دانية .رشا .و لاء. ناردين .بحرالعطاء.... افرحولي و لاتزعلو
بابا دير بالك على اخواتي و على حالك و سأل عن احفادك عبد الله و إيمان ما بتعرف يمكن بيوم يجو يزوروك
عاشقة البحر..... مابعرف فيكي شي بيقربني منك الله يقويكي و يحميكي لولادك يا رب بدي و صيكي على اولادي شهد ما بتعرف يمكن تتلبك بإيمان بدي ياكي تكوني معها هي بحياتها ما ربت ولاد صغار الله يوفقك و يوفقها
ديري بالك على حالك
دانية....بتتذكري مرة شبهتك بستنا مريم العدرا مو لانك بتشبهيها فما حدن بيعرف شكل العدرا بس اكيد كانت طهارتك هي لي شبهك فيها خليكي متل ما انت طاهرة . حنونة. و ديريبالك عاحالك
الله يبعتلك شي عريس يفش القلب و يصونك و يحفظك من هالدنية
كبرياء....حبيبة فلبي و اختي ندى انا رح اتنازل عن لي اتفقنا عليه مع دانية بيوم من الايام بتتذكري و بتركلك ياه بلا منازع لانك بيني و بينك ما كان رح يطلعلك معي انا داهية ديري بالك على حالك وخليكي متل ما انت
[هنا كتبت مطولا ولكن اعتقد انا ألامها ازدادت ولم تكن تريد ان تتوقف ولكن للاسف لم استطع فهم وفك طلاسم ما كتبته]
انا تعبت كتير ملك الموت عم يستناني لاخلوص الرسالة الدنيا برد و التلج مكوم بوصيكم ما تنسو الضحكة والابتسامة قد ما كانت همومكم كبيرة ما في شي بيستاهل التكشيرة
المؤمن منو حلو لمن بيكشر والله يحب الجمال
ما لكم وقت الديقة غير الصلاة عالنبي مع الابتسامة بتهدي النفس ان شاء الله
شوفو انا كانت همومي وو جعي كبير و مع هيك الضحكة ما فارقتني و انتو السبب
على قولة المتل الطير يضحك مذبوحا من الالم

الدكتور مصطفى . ابو عبد العزيز.ابو انس و كتير من الناس ....بعرف انكم كنتو على استعداد انكم تلبوني بشو ما اطلب بس اعذروني باخر فترة كنت تعبانة كتير مع اني صرت عاجزة او تقريبا عاجزة بس ربي الحمد لله لهل الوقت بحمدو ضليت بعقلي ومني حموت بلا عقل بإذن الله
طارق ....يالغالي قدمتلي كتير و كنت بحر و مابخلت علي بيوم باي شي و انا لمن كنت بدي اشكي ما كنت لاقي غير قلبك لارمي فيه همومي الله يوفقك و يرزقك يارب دير بالك على ابنك لانو اكيد رح يشبهك و اذا كانت بنت انشالله ما تشبهني بيخرب النسل ههه .لانك اصيل و فرخ البط عوام
دير بالك عاحالك و خليك متل مانت اصيل
غريب....مع انو اسمك غريب بس انت كنت قريب
انا اسفة انت كنت استاذ كبير حاولت تعلمني تنزيل الصور بس انا هيك دماغي ناشفة و فهمي على قدو ههه
لا لاتسدق انا ذكية و بلقطها وهي طايرة بس بدي مين يشرحلي مطولا و بالتفصيل الممل
الله يرزقك و يوفقك يارب
الوداع يا غالي

الفارس المغامر..........اخي الصغير دير بالك عاحالك والله يرزقك يارب

[هنا ايضا كتبت و لكن لم افهم ما كتبته]
قمر....بعرف بطبعك الحمق دايما حتقول ماشي يا سارة تركتيني للاخير بس انا بقلك اني انا قاصدة انك تكون اخر مين بكتبلو قمر
سامحني الي عملتو كان لمصلحتك اكتر من هو لمصلحتي هي انا رح ودع دنيتكم لحياة تانية
قمر باخر رسالة بعتتها انت نهيتها بكلمة لا اله الا الله و انا ما رديت عليها بس هلاء برد عليك و بقلك محمد رسول الله
بوصيك دير بالك عا حالك ومني حخوصيك انك ما تنساني لانك ما لازم تنساني ... صح؟
انا تعبت كتير قلبي حيوقف الساعة 5 الفجر رح ودعكم لالالا رح قلكم الى اللقاء يا اغلى مين عرفت
انا رايحة اتيمم و صلي الصبح
السلام
.................................................. ................
ماتت في الساعة الخامسة و الربع تقريبا و كان ملك الموت كان ينتظرها حقيقة اتمنى ان تكون شهدت صلاة الفجر
الورقة وجدت على سريرها ولكنها كانت مكتوبة باللغة العربية فلم يعرها احد اهتماما
انا لله وانا اليه راجعون
كان بين السطور كلام كثير ولكني عبثا حاولت تفسيره دون جدوى
عظم الله اجركم واسكن فقيدتنا الغالية


التعديل الأخير تم بواسطة : حلب الشهباء بتاريخ 11-01-2008 الساعة 01:15

رد مع اقتباس